Մեռա՛նք ասելով՝ ստի ոտը կարճ է.7or.am



Օրերս Փաշինյանը, փրփուրներից բռնվելով` կորոնավարակի պայմաններում իրականացվող «ռազմավարական» ծրագրերի իմիտացիա անելով, ՖԲ իր էջում «Կորոնավիրուսն ո՞ւմ շունն է, որ ընդհատի մեր տնտեսական թռիչքը» շարքից հերթական «հաղթողական» գրառումն էր արել.

«2020 հուլիսին Հայաստանի Հանրապետությունում աշխատող քաղաքացիների համախառն աշխատավարձի ֆոնդը կազմել է 127 մլրդ 391 մլն ՀՀ դրամ. սա այն գումարն է, որ վճարվել է գործավորներին եւ որի դիմաց եկամտային հարկ է հաշվարկվել: Նույն ցուցանիշը 2020թ. հունիսին կազմել է 120 մլրդ 846 մլն դրամ, իսկ 2019թ. հուլիսին՝ 117 մլրդ 627 մլն դրամ»։

Այսինքն թե` «կորոնավիրուսահեն» 2020թ. հուլիսի դրությամբ «համախառն աշխատավարձի ֆոնդը» նախորդ տարվա նույն ժամանակահատվածի համեմատությամբ ավելացել է ամբողջ 9,764 միլիարդ դրամով կամ, որ նույնն է, ավելի քան 20 միլիոն դոլարով։ Որքանով է այս «վիճակագրությունը» համապատասխանում իրականությանը` «հերձումը ցույց կտա», բայց նույնիսկ եթե մեզ միամիտի տեղ դնենք` հավատանք, որ ամեն ինչ ճիշտ է, հետաքրքիր պատկեր է ստացվում։

Այսպես, AntiFake.am-ի հարցմանն ի պատասխան` ՀՀ Պետական եկամուտների կոմիտեից հայտնել են, որ միայն 2019 թվականին ՊԵԿ աշխատակիցներին 5.598.360.000 դրամի` մոտ 11.8 միլիոն դոլարի համարժեք պարգևավճարներ են բաժանվել։ Հաշվենք, թե դրա կեսը, այսինքն` 5,9 միլիոնը, բաժին է ընկել 2019թ. երկրորդ կիսամյակին` 2019-2020թ. հաշվետու ժամանակահատվածի առաջին կեսին, այդքան էլ`մի քիչ ավելի, մի քիչ պակաս`2020-ի առաջին կիսամյակին։ Ընդհանուր առմամբ, թող լինի 10-11, ամենահամեստ հաշվարկներով` 9 միլիոն դոլար։

2020թ. առաջին եռամսյակում, նախարարություններից ստացված պաշտոնական տվյալներով, որոնց մեջ ՊՆ ցուցանիշն արտացոլված չէ, պարգևավճարների «համախառն ցուցանիշը» կազմել է ավելի քան 1 միլիարդ 270 հազար միլիոն դրամ կամ 2, 65 միլիոն ամերիկյան դոլար։ Բազմապատկենք դա 2-ով`կստանանք 5,3 միլիոն։ Ավելացնենք Ազգային ժողովին, Երևանի քաղաքապետարանին, մարզպետարաններին իրենց «ծանր, հոգնեցուցիչ և պարզապես անձնվեր» աշխատանքի դիմաց հատկացված պարգևավճարները, և պարզ կլինի, թե ինչից է գոյացել այդ 20 միլիոն դոլարի «հավելաճը», որով Փաշինյանը հպարտանում է։

Բայց դա էլ ամենը չէ։ Որպեսզի ընթերցողին շատ չծանրաբեռնենք թվերով, հիշեցնենք Yerkir.am-ի` ս.թ.մայիսի 13-ին հրապարակած տեղեկատվությունը, ըստ որի, «20 ամսվա ընթացքում, սկսած 09.05.2018 թվականից, այն է` Փաշինյանի իշխանության ձևավորման օրվանից (այսինքն` մինչև 2020թ. հունվարի 1-ը -Լ.Պ.) պետական բյուջեից վճարվել է ավելի քան 51 895 524 750 ՀՀ դրամ կամ 108 115 677 ԱՄՆ դոլար պարգևավճար, որի գերակշիռ մասը տրվել է 2019 թվականին»։ Սրանք ոչ թե «մատից ծծած» թվեր են, այլ գերատեսչությունների տրամադրած պաշտոնական տվյալների հանրագումարը, որտեղ 2020-ի առաջին կիսամյակի տվյալները չեն մտնում։ Եթե հաշվի առնենք, որ պետական ապարատի «մշակներն» առատորեն պարգևատրվել են նաև կորոնաճգնաժամի պայմաններում, պարզ կդառնա, որ հուլիսի դրությամբ այդ ցուցանիշն էական աճ է գրանցել։

Զարգացնելով թեման` Փաշինյանը կրկնել է ավելի վաղ բարձրաձայնած ակնհայտ կեղծ թեզը, թե` չնայած կորոնավիրուսի դեմ «կատաղի պայքարին» ու դրանով պայմանավորված տոտալ սահմանափակումներին, ամբողջությամբ կամ մասնակի պարապուրդի մատնված, կիսատ-պռատ աշխատող`«ոչ մեռած, ոչ սաղ» տնտեսության մեջ ներգրավված քաղաքացիների` «գործավորների» թիվը ոչ միայն չի պակասել, այլ... ավելացել է. «Եթե 2019թ. հուլիսին համախառն աշխատավարձը բաշխվել է 606 հազար 465, իսկ 2020 թվականի հունիսին 609 հազար 302 աշխատատեղերի միջեւ, ապա 2020 թվականի հուլիսին աշխատավարձի հիմնադրամի բաշխմանը մասնակցել է 613 հազար 62 աշխատատեղ»:

Ավելին. «Եթե 2019թ. հուլիսին մեկ աշխատատեղին բաժին հասած միջին աշխատավարձը կազմել է 193 հազար 955 դրամ, 2020 թվականի հունիսին՝ 198 հազար 335 դրամ, 2020 թվականի հուլիսին այդ թիվը կազմել է արդեն 207 հազար 795 դրամ:

Հիշեցնեմ, որ 2020 թվականի ապրիլից ի վեր կառավարությունը ընդունել է մի շարք հակաճգնաժամային միջոցառումներ, որոնց նպատակը աշխատատեղերի պահպանումն է եւ աշխատավարձերի անկումը կանխելը:

Պաշտոնական այս թվերը ապացուցում են, որ այդ միջոցառումները արդյունավետ են եղել»:

Իրականում, եթե այդ թվերն ինչ-որ բան են ապացուցում, ապա`միայն այն, որ «համախառն աշխատավարձի ֆոնդի» 20 միլիոն դոլարանոց և միջին աշխատավարձի 13 հազար դրամանոց «աճը» եղել է բացառապես պետական չինովնիկներին, հիմնականում և առաջին հերթին` բարձր ու միջին օղակների պատասխանատուներին բյուջեից տրված «բոլ-բոլ» պարգևա(հավելա)վճարների հաշվին։

Նկատի ունենալով, որ դրանց չափը «միջին հաշվով» 2-3 անգամ գերազանցում է 20 միլիոնը, «վերջնարդյունքում» ստացվում է, որ այդ կատեգորիայի մեջ չմտնող հպարտ քաղաքացիների եկամուտներն, ինչպես և պետք էր ենթադրել, կրճատվել են։

Այնպես որ, պետք չէ «ժանգլյորություն» անել թվերով, պարո՛ն Փաշինյան։ Մեռանք ասելով` ստի ոտը կարճ է։

Հասկանում ենք` կորոնավիրուսը Ձեր, Ձեր մերձավորների, խնամի-ծանոթ-բարեկամների, հավատարիմ ծառաների, Ձեր ենթակայության տակ գտնվող, Ձեր դուդուկի տակ պարող մեծուփոքր պաշտոնյաների բարեկեցությանը վնաս չէ, բայց մարդկանց ականջից մակարոնեղեն կախելով`հեռու չեք գնա...

Լիլիթ Պողոսյան